Rai yang, dai ni na prat gaw Yi Sun hkau na ni galaw sha nna sha nga pra ai baw mung n re sai hte maren yawng gaw tinang hte htuk manu ai hku nna kan bau magam bungli galaw lu galaw sha ai ladat ni mung shai mat wa ai lam ni nga nga ai re. Tinang a kun dinghku nga pyaw na matu ngu nna mung kaga lam amyu myu hku nna mung shinggan maigan mungdan hkan gumhpraw tam sa mat ai Ramma ni mung law law wa rai nga na saga ai.

Maigan de pru hkawm sa nna, Ja Gumhpraw tam hkawm mat ai Ramma ni ngu ai hta nye a mu mada ai lam langai mi hpe tsun dan mayu nngai. Lai wa sai ten 4,5 ning daram ngai Miwa mung kaw nga ai shaloi anhte wunpawng ramma ni nkau mi law malawng a bungli galaw sha ai lam, lu ai bungli shabrai hpe gara hku mahkawng nna gara hku jai ai lam ni hpe mu mada wa hku re.

Nkau mi gaw, Gumhpraw hpe atsawm sha chye mahkawng nna nta buga de lu shagun jaw ai sha n ga, tinang a prat a matu yaw shada lam nga nga, masing nga nga hte mahkawng la lu ai ni nga ai zawn nkau mi rai yang lani mi na bungli shabrai hpe lana mi sha n ma n mai hku nna jai ayai kabai kau ai ramma ni mung sawng sawng rai nga ma ai.

Ndai zawn re lam ni hpe myit yu yang, dai ni na ramma ni hta 80%gaw, yaw shada lam n nga, myit shingran n nga, pandung n nga ai sha majoi wam dam hkawm ai ni re hpe asan sha mu mada lu nga ai.

Bai nna, Online ngu ai lam hpe chyi mi bai jawm jahta yu ga. Dai ni ndai daram prat madang tsaw nna rawt jat nga ai Mungkan hta anhte wunpawng ramma ni wa Online ntsa hta hpa wa chye galaw sha nga saga ta? Ga san ni law law mai san wa ai hpe mu lu ai. 

Ga Shadawn; Social media app n'tsa kaw tinang kung kyang ai lam lama ma hpe sharin ya ai baw zawn re ni, gat dut dut ai lam zawn re ni hte kaga lam amyu myu hpan hkum hkra mai galaw ai, shang gumhpraw mai lu ai lam hta pyi anhte gaw, 10% ram sha pyi aten jaw let galaw ai lam n nga ai hpe asan sha mu lu  nga ai.

Naw matut ka na nngai...

Kaga Laika ka sara ni hpe mung saw shaga nngai law.

Matut Mahkai hkringdat: 09425701694

jarlarmahtai19@gmail.com kaw matut mahkai wa mai ai.