KA-NI NANGHPAM A LABAU HPE MADA JAHPROI ( Daw - 1 )

Sawk Ka: Lapyaw Hkawng Ze ( NSLD )

Chyurum Wunpawng Amyu sha ni yawng ngwi pyaw hkam kaja nga mu ga ngu shawng shakram dat nngai.

Myu sha ni hpe katsi majan hte gasat shamyit nga ai ka-ni nanghpam hpyen a lam hpe ka na matu Ginjaw Ginra Ginwang Ginjaw Ka-ni Nanghpam pat jasan Ningtau Amu madu sa tsun shadut dat ai majaw, ngai ka taw nga ai sumrai ga baw hpe gan jahkring tawn nhtawm, ndai nanghpam hte seng ai ka ngau hpe ka hpang mat wa ai lam rai sai. Ka-ni nanghpam a lam mi nga tim, ndai kaw ka tawn da ai hkum tsup tang du sai ngu tsun mayu ai lam n rai nga ai. Laika ka ai wa mu sawk ai daram hpe ka tang madun tawn da ai lam sha rai na re. 

Ka-ni nanghpam a lam hpe tsun wa ga nga yang, Sinpraw ka-ang ginra nam maling shara mi hta nam kaw shi hkrai tu ai nampan hpun hpan langai mi rai nga ai. Dai nampan hpun kaw na pru ai naw gaw, manam pyaw ai hte shinggyim masha ni tsi mawan hku nna jai lang chye ai kaw nna, hpang daw de masha a matu myit pyaw tsi hku chye lang wa sai. Ndai a lam hpe ( B.C 5000 ) daram ten Mesopotamia dingdung daw ( Era ) Mungdan kaw nga ai Somarian amyu sha ni shawng chye hpang wa ai re lam hpe sawk tam lu nga ai. 

Dai kaw na lu su ai masha ni sha lu mari lang wa ai majaw, lu su sahti ni a lu sha hpan langai mi byin tai wa sai lam rai nga ai. Jut shara shagu chyam bra chye jai lang wa ai majaw, hpaga rung rai byin tai wa nna, hkai shatut la ai madang de du wa sai. Ka-ni hpe n'nan chye lu sha wa ai shaloi gaw, hkumhkrang hta makret machyi ai lam hpe hkyam sa lu ai majaw tsi hku nna akyu jashawn jai lang ai lam galaw ai. Ka-ni gaw, kalang lu sha hkrup yang matut manoi lu sha mayu ai rai nna, hpang jahtum ya byin ai kaw du hkra rai nga ai. Ndai zawn rai Ka-ni ya ni law htam wa ai majaw, hpaga yumga amyat tam ai hpaga gat lawk de du shang wa ai lam rai nga ai.